Slapp'a!

Er det ikkje det eine, så er det det andre. Ved hjelpa av mange "nyttige idioter", til dømes media, har svineinfluensaen fått eit riktig dårleg rykte på seg, og det kan kjennast som om det nesten er unntakstilstand i landet - i alle fall like før. Men no har svineinfluensaen herja litt rundt og var visst ikkje så farleg som fyrst frykta.

Me som tok det heile med slåande ro kan spandera på oss setninga: "Kva var det eg sa?" Det er ikkje over ein mill. nordmenn som har vorte smitta, fantastisk få har daua på verdsbasis, pandemien har føreløbig ikkje slått ut verken offentlege tenestar eller næringslivet, og eg tvilar sterkt på at svineinfluensaen kjem til å råke valet hardt (men klart, i min stille bønn ber eg om at det råkar dei som skal stemma Frp og Høgre...).

Det er likevel ikkje fritt for litt hysteriske tilstandar i media. Vaksinering har vore på dagsorden lenge, men no rykk medisineringa opp eit par plassar og ein kan lesa kor farleg vaksinen kan vera. Aller helst må dei leggja på litt historiske fakta for å underbyggja at det ikkje berre er spekulasjonar, og kva er vel betre enn å skriva om alle som døydde i USA i 1976 pga vaksinen. Elles kan me lesa at ein kan verta lam. Dette er skremmande lesning - i alle fall for enkelte. Eg kan sjå for meg at enkelte som har fått svineinfluensavaksine svettar litt ekstra etter å ha lese dei, kanskje i sær etter å ha lest at vaksinen ikkje ein gong testes før den brukes.

Ein ser lett at alt oppstyret rundt svineinfluensapandemien skapar meget uheldige konsekvensar. Masseprodusering av vaksinar som køyres rett frå fabrikken og ut til småbeskymra menneske utan at dei er tilstrekkeleg testa. Karleggja kven som reagerar på vaksina, kva bieffektar ho eventuelt har, forbetringar etc. må vika for at folk skal få ei, moglegens falsk, sikring mot influensaen.

Det er kanskje lett for meg å sei, som ikkje er spesielt utsatt for å bli skikkeleg sjuk av influensaen, men eg har på ingen måte tenkt å la nokon stikka det der greiene inn i meg. Eg tåler ei influensa, det gjer dei aller fleste, og svineinfluensa er ein mild form for influensa, det høyrer til sjeldanheitene at nokon hamnar i respirator.

Kan folk vennlegst roa'n ned litt, senka skuldrene og venda tilbake til normalpuls; svineinfluensaen er ikkje verdas undergong, skjønnar du. Det ikkje røynda sin versjon av "28 days later".